Ерөнхийлөгчийн санаачилсан “Тэрбум мод” үндэсний хөдөлгөөний хүрээнд экологийн аюулгүй байдлыг хангах, хөрсний бохирдлыг бууруулах зорилгоор төвлөрсөн хогийн цэгүүдийг ойжуулна.

Ойжуулах төслийн нээлтэд Ерөнхийлөгч У.Хүрэлсүх оролцож, байгууллага, аж ахуйн нэгж, иргэдтэй хамт мод тарилаа.

Тэрбээр, мод тарьж, ургуулах нь цөлжилт, шар шороон шуурга, газрын доройтлоос сэргийлэх хамгийн сайн арга гэж үздэгээ хэлж, “Тэрбум мод” үндэсний хөдөлгөөнд идэвхтэй оролцож байгаа дотоод, гадаадын байгууллага, хувийн хэвшил, иргэний нийгэм, иргэдэд талархал илэрхийллээ.

Цагаан давааны 15 га талбайд 312 мянган ширхэг хайлаас модны суулгац тарьж ургуулан, хогийн тоосжилтыг барих, агаар дахь хорт бодисыг шүүх ургамлан хашлага бий болгоно.

Ойн мэргэжлийн “Хамтын төгөл” ХХК нэг жил, цаашид Нийслэлийн Хот тохижилтын газар гурван жил арчилгаа, хамгаалалтыг бүрэн хариуцаж байна.

Энэ бол төвлөрсөн хогийн цэгүүдийг ногоон бүс болгох цогц ажлын эхлэл юм.

Энэ хүрээнд Нарангийн энгэр, Цагаан давааны 50 га талбайд нийт 870 гаруй мянган навчит мод тарьж ургуулахаар төлөвлөжээ.

Улаанбаатар хотод Нарангийн энгэр, Цагаан даваа, Морингийн давааны гэсэн төвлөрсөн гурван хогийн цэг байдаг.  Энд өдөрт дунджаар 3,000 орчим тн хог хаягдал ирдэг бөгөөд хог хаягдлын хэмжээ жил ирэх тусам нэмэгдэж байна.

Цагаан давааны 92 га талбай бүхий хогийн цэгт хотын зүүн болон төвийн бүсийн айл өрх, аж  ахуйн нэгжүүдийн хог хаягдлыг төвлөрүүлдэг. Үүний 23 га талбай нь хог хаягдал хүлээн авах зориулалттай.

2020-2022 онд 10 га талбайг нөхөн сэргээж, хогийн цэгээс тусгаарлах гурван метр өндөртэй, 360 метр урт төмөр торон хашаа барьжээ.

Нарангийн энгэрийн хогийн цэгийг Японы буцалтгүй тусламжаар олон улсын стандартын дагуу тохижуулсан. Энд хог булшлах талбайн хөрсөнд бохирдол нэвчихээс хамгаалах тусгаарлагч давхарга байгуулж, хог хаягдлын ялзрал, шүүрлээс үүсэх бохир шингэнийг зайлуулах хэвтээ хоолойн систем суурилуулсан байна.

2020-2022 онд энэ хогийн цэгийн 20 га талбайг нөхөн сэргээсэн. Мөн 2020–2025 онд “Улаанбаатар шинэчлэл” ХХК нийслэлийн хөрөнгөөр 15 га талбайд техникийн болон биологийн нөхөн сэргээлт хийжээ.

“Тэрбум мод” үндэсний хөдөлгөөний хүрээнд энэ жил 50 сая, ирэх жилээс 100 саяаас дээш мод тарьж, ургуулна.

Өнөөдрийн байдлаар улсын хэмжээнд 128 сая модыг шууд болон дүйцүүлэх хэлбэрээр тарьж, арчилж, хамгаалж байна.

2030 он гэхэд уул уурхайн томоохон аж ахуйн нэгжүүд 608 сая, аймаг, нийслэл 680 гаруй сая мод тарьж, ургуулан “Тэрбум мод” үндэсний хөдөлгөөнд голлох хувь нэмэр оруулах амлалт авсан.

Энэ дагуу үе шаттай төлөвлөгөө гарган бэлтгэлээ хангаж, ирэх жилүүдээс тарилтаа эрс эрчимжүүлнэ.

Үндэсний хөдөлгөөн өрнөсөн 2021 онд 8 сая байсан тарьц, суулгацын нөөц  одоо 164 саяд хүрч, Мод үржүүлгийн газар, тусгай зөвшөөрөлтэй аж ахуйн нэгж, нөхөрлөлийн тоо хэдэн зуугаар нэмэгдээд байна.

Нийтийн эзэмшлийн гудамж, талбай болон зорчих хөдөлгөөнд саад учруулж байршуулсан ТҮЦ-үүдийг өнгөрсөн оны дөрөвдүгээр сараас эхлэн нийслэл, дүүргийн Засаг даргын захирамжаар эрчимтэйгээр нүүлгэж, нийтийн эзэмшлийн зам талбайг чөлөөлж эхэлсэн. Тодруулбал, өнгөрсөн онд нийслэлийн төвийн зургаан дүүргийн хэмжээнд нийт 1436 ТҮЦ-ийг нүүлгэж, зам талбайг чөлөөлсөн юм.  Ингэснээр явган хүний зам, нийтийн эзэмшлийн талбайн хүртээмж сайжирч, иргэдийн аюулгүй, чөлөөтэй зорчих нөхцөл бүрдсэн. Мөн хотын өнгө үзэмж, орчны стандарт сайжрав.

НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

Төрийн албаны тухай хуульд оруулсан нэмэлт өөрчлөлтөөр Төрийн албаны ерөнхий шалгалтыг улиралд нэгээс доошгүй удаа зохион байгуулахаар зохицуулсан. Энэ хүрээнд Төрийн албаны зөвлөлөөс баталсан товын дагуу 2026 оны II улирлын шалгалт өнөөдөр орон даяар нэгэн зэрэг эхэллээ.

Шалгалтыг нийслэл болон орон нутагт цахим хэлбэрээр зохион байгуулдаг. Энэ удаагийн шалгалтад оролцохоор Улаанбаатар хотод 1157, улсын хэмжээнд 2321 иргэн бүртгүүлсэн байна. Улаанбаатар хотод Төрийн албаны ерөнхий шалгалт 2026 оны тавдугаар сарын 18–21-ний өдрүүдэд үргэлжилнэ. Өдөрт дөрвөн ээлжээр, нэг ээлжид 100 иргэн шалгалт өгөх юм.

Харин 2026 оны нэгдүгээр улирлын шалгалтад Улаанбаатарт 1532 иргэн бүртгүүлж, 1049 иргэн шалгалт өгсөн. Үүнээс 458 иргэн ерөнхий мэдлэг, 410 иргэн монгол хэл бичиг, 365 иргэн дүн шинжилгээ хийх чадварын шалгалтад тус тус тэнцсэн. Ингэснээр оролцогчдын 34.8 хувь буюу 365 иргэн нөөцөд бүртгэгдэх болзол хангасан.

Төрийн албаны ерөнхий шалгалт цахим хэлбэрт бүрэн шилжсэнээр ил тод, нээлттэй, хөндлөнгийн нөлөөлөлгүй явах нөхцөл бүрдсэн юм.

Улсын хэмжээнд тавдугаар сарын 17-ны өдрийн байдлаар нийслэлийн 2 дүүрэг, 12 аймгийн 50 суманд101 удаагийн ой, хээрийн гал түймэр бүртгэгдлээ. Энэ нь өнгөрсөн  оны мөн үетэй харьцуулахад 11.8 хувиар өссөн үзүүлэлттэй байна.

Үүнээс сүүлийн 7 хоногт гэхэд Дорнод аймагт 3, Сүхбаатар аймагт 4, Булган аймагт 1, Хэнтий аймагт 2, Төв аймагт 2, Сэлэнгэ аймагт 3 буюу нийт 15 удаагийн ой, хээрийн гал түймэр бүртгэгдснээс 12 түймрийг бүрэн унтрааж,  Төв аймгийн Мөнгөнморьт, Хэнтий аймгийн Батширээт суманд гарсан  2 түймрийг цурамд оруулсан бол Сэлэнгэ аймгийн Ерөө суманд гарсан ойн түймрийг унтраах ажиллагааг зохион байгуулж байна.

Түймрийг унтраахаар Онцгой байдлын байгууллага, Хилийн цэрэг,  мэргэжлийн ангийн  нийт 107 хүн, 7 автомашин, 13 морьтой ажиллаж байна.

Монгол Улсын Ерөнхийлөгч Ухнаагийн Хүрэлсүх АШУҮИС-ийн эрдэмтэн багш, ажилтнуудтай уулзлаа.

АШУҮИС нь бүрэлдэхүүн 8, орон нутаг дахь харьяа 3 сургууль, судалгааны нэгжтэй. 800 орчим багш, ажилтан, 16 мянга гаруй оюутантай, эрдэм оюуны томоохон төв юм.

Хүн амын амь нас, эрүүл мэндийн төлөө эрдэм мэдлэг, ур чадвар, зүрх сэтгэлээ зориулан ажиллаж байгаа АШУҮИС-ийн үе үеийн эрдэмтэн багш, хамт олон, төгсөгчдөд Ерөнхийлөгч талархал илэрхийлж, амжилт хүслээ.

Тэрбээр, эрүүл мэндийн салбарын гол тулгуур болсон тус сургууль дэлхийн шилдэг их сургууль болох алсын хараа, шинжлэх ухаан, боловсрол, эрүүл мэндийн салбарт манлайлах зорилгоо биелүүлнэ гэдэгт итгэл төгс байгаагаа онцоллоо.

Ерөнхийлөгч өнгөрсөн он жилүүдэд хийсэн ажил, санаачилсан үндэсний хөдөлгөөн, хөтөлбөрийн хэрэгжилт, гадаад харилцаа болон нийгэм, эдийн засгийн байдал зэргийн талаар товч танилцууллаа.

Ерөнхийлөгчийн бодлого, үйл ажиллагаа, санаачилга, дэмжлэг, үндэсний хэмжээний хөдөлгөөн, хөтөлбөр нь боловсролын салбарын хөгжилд үр дүн авчирч байгааг сайд Л.Энх-Амгалан хэллээ.

Тухайлбал Ерөнхийлөгчийн санаачилга, дэмжлэгээр эхлүүлсэн АШУҮИС-ийн “Сувилахуйн сургалт, судалгааны төв”-ийн бүтээн байгуулалт ойрын хугацаанд дуусаж, ашиглалтад орно.

Энэ төв олон улсын стандартад нийцсэн сургалт, судалгааны орчин, сувилахуйн тасралтгүй сургалт, мэргэжлийн хөгжлийн тогтолцоо, эмнэлзүйн ур чадварын дуураймал орчин бүхий үнэлгээний төв, мэргэшүүлэх цахим сургалтын төвтэй байх юм.

Ерөнхийлөгчийн зарлигийн дагуу уламжлалт анагаах ухааны хөгжлийн асуудлаар төрийн бодлогын уялдааг хангах зорилгоор Ерөнхий сайдын дэргэд Үндэсний зөвлөл байгуулж, уламжлалт анагаах ухааны анхдагч хуулийн төсөл боловсруулж байна.

АШУҮИС-ийн харьяа “Эрхэс” уламжлалт анагаахын 100 ортой сувилал нь сувилагч, эмнэлгийн мэргэжилтний дадлагын суурь бааз болох төдийгүй уламжлалт анагаах ухааны тусламж, үйлчилгээ үзүүлнэ.

Шинэ хичээлийн жилээс Уламжлалт анагаах ухааны шавь сургалттай ерөнхий боловсролын сургууль байгуулах болжээ.

Ерөнхийлөгч захирамж гарган хавдрын урьдчилан сэргийлэлт, оношилгоо, эмчилгээ, эрдэм шинжилгээ сургалтын цогцолбор бүхий “Хавдар судлалын үндэсний хоёрдугаар төв”-ийг байгуулахад дэмжлэг үзүүлэх Ажлын хэсэг ажиллуулж байна.

Төрийн тэргүүний санаачилга, дэмжлэгээр Улсын хоёрдугаар төв эмнэлгийн Эрхтэн шилжүүлэн суулгах төв ашиглалтад орсон бол Уламжлалт анагаах ухааны үндэсний төвийн бүтээн байгуулалт ид өрнөж байгаа.

Хангайн бүсийн аймгуудад сувилагч, эмнэлгийн мэргэжилтний дутагдлыг арилгах зорилгоор Ерөнхийлөгчийн дэмжлэгээр Архангай аймагт АШУҮИС-ийн “Сувилахуйн сургалт, эрдэм шинжилгээ, эрүүл мэндийн тусламж, үйлчилгээний цогцолбор” байгуулсан.

Энэ цогцолбор сувилагч, уламжлалт анагаахын сувилагч, эм найруулагч, нүүр амны техникч, нүүр, амны эрүүл ахуйч, эмнэлзүйн лабораторийн технологич, дүрс оношлогооны техникч бэлтгэдэг юм.

АШУҮИС-ийн Нүүр, ам судлалын төв эмнэлгийн салбар Шүдний эмнэлэг, Монгол анагаах ухааны төв эмнэлгийн салбар, Уламжлалт анагаах ухааны клиник Хангайн бүсийн иргэдэд тусламж, үйлчилгээ үзүүлж байна.

Ерөнхийлөгчийн санаачилгаар 140 тэрбум төгрөгийн хөрөнгө оруулалт бүхий Шинжлэх ухааны хүрээлэнгүүдийн цогцолборын барилгыг удахгүй ашиглалтад хүлээн авна.

2022 онд Япон Улсад хийсэн төрийн айлчлалын үеэр ярилцаж тохиролцсоны дагуу “Япон-Монголын Сасакава тэтгэлэгт хөтөлбөр”-т хамрагдах орон нутгийн 1,000 оюутны эхний 100 нь амжилттай суралцаж байна. АШУҮИС энэ хөтөлбөрийн хүрээнд эмнэлзүй, нийтийн эрүүл мэнд, хоол зүйн чиглэлээр дээд боловсролтой мэргэжилтэн бэлтгэх юм.

АШУҮИС эрүүл мэндийн салбарт ажиллаж буй нийт эмч, сувилагч, мэргэжилтний 93 хувийг дангаараа бэлтгэдэг.

Боловсролын яам, Эрүүл мэндийн яам, АШУҮИС уламжлалт анагаах ухааныг хөгжүүлэх эрх зүйн орчныг бүрдүүлэх, судалгаа, инновацыг эрчимжүүлэх, сургалт, хүний нөөц бэлтгэх, эмийн үйлдвэрлэл, ханган нийлүүлэлтийн тогтолцоог бүрдүүлэх чиглэлээр хамтран ажиллахаар төлөвлөсөн байна.

Монгол Улсын Ерөнхийлөгч У.Хүрэлсүх мөн өдөр АШУҮИС-ийн харьяа Ерөнхий боловсролын ахлах сургуулийн зөвлөх багш, доктор, профессор Нянзаадарын Даваасүрэн, Био-Анагаахын сургууль, Бичил амь судлал, халдварын сэргийлэлт хяналтын тэнхимийн ахмад багш, профессор Цэрэндоржийн Дагвадорж нарт Гавьяат эмч, Дотоод шүүрэл судлалын тэнхимийн багш, Монгол-Японы эмнэлгийн зөвлөх эмч, Анагаах ухааны доктор, профессор Хасагийн Алтайсайханд Хүний гавьяат эмч цол хүртээж, нэр бүхий эрхмүүдийг төрийн дээд одон, медалиар шагналаа.

Сүүлийн хоёр жилд нийслэлийн өмчийг хууль бусаар эзэмшиж байсан этгээдүүдээс 6 тэрбум гаруй төгрөгийн 15 барилга байгууламжийг буцаан авч нийслэлийн өмчид бүртгүүллээ. Ингэснээр 2024 онд 7.4 тэрбум, 2025 онд 18.2 тэрбум төгрөгийн орлогыг нийслэлийн төсөвт төвлөрүүлсэн байна. Өнгөрсөн хугацаанд дараах 15 барилга байгууламжийг буцаан авчээ.

• Төв цэнгэлдэх хүрээлэн
• “Уламжлалт анагаах ухааны элэг судлалын клиник төв”-ийн барилга байгууламжууд
• Урт цагаан худалдаа үйлчилгээний төв
• Чингэлтэй дүүргийн 5 дугаар хороонд байрлах “Баруун сэлбэ” үйлчилгээний төвийн Ж блокийн 1220 ам метр талбай бүхий барилгыг нийслэлийн өмчид авч, нээлттэй дуудлага худалдаагаар хувьчилж, 1.9 тэрбум төгрөгийн орлогыг нийслэлийн төсөвт төвлөрүүлсэн.
• Хан-Уул дүүргийн 2 дугаар хороонд байрлах “Монгол шуудан” ХК-ийн 36-р салбарын түрээсээр эзэмшиж байсан байрыг нийслэлийн өмчид бүртгэн авсан.
• Баянгол дүүргийн 14 дүгээр хороонд байрлах Шуудангийн 24-р салбар түрээсээр эзэмшиж байсан байрыг “Тэмүүжин групп майнинг” ХХК дам түрээсэлж ашиг олдог байдлыг зогсоож, нээлттэй дуудлага худалдаагаар хувьчилж 1.6 тэрбум төгрөгийн орлогыг нийслэлийн төсөвт төвлөрүүлсэн.
• Баянгол дүүргийн 8 дугаар хороонд байрлах “Аминжаргалан” өрхийн эрүүл мэндийн төвийн барилгыг таван жилийн хугацаанд түрээсийн орлогогүйгээр эзэмшиж байсан иргэнээс түрээсийн орлогыг нэхэмжилж, барилгыг хууль бус эзэмшлээс салган тухайн дүүргийн Засаг даргын Тамгын газарт үргэлжлүүлэн түрээсэлж, түрээсийн орлогыг нийслэлийн төсөвт төвлөрүүлэн ажиллаж байна.
• Сүхбаатар дүүргийн 2 дугаар хороонд байрлах “Ачит гар” өрхийн эмнэлэг байрлаж байсан байрыг тус эмнэлгийн эзэмшлээс авч нээлттэй дуудлага худалдаагаар хувьчилж, 334 сая төгрөгийн орлогыг нийслэлийн төсөвт төвлөрүүлсэн.
• Өргөө зочид буудал

Мөн энэ онд Баянзүрх дүүргийн нэгдсэн эмнэлэг, Сүхбаатар дүүргийн нэгдсэн эмнэлэг, Соёлын төв өргөөний “В” корпусыг нийслэлийн өмчид буцаан авахаар хэлэлцээр хийж байна.

Эх сурвалж: НЗДТГ-ЫН ХЭВЛЭЛ МЭДЭЭЛЭЛ, ОЛОН НИЙТТЭЙ ХАРИЛЦАХ ХЭЛТЭС

Цагдаагийн байгууллагын 102 тусгай дугаарт 2026 оны 05 дугаар сарын 17-ны өдөр нийт 1980 дуудлага, мэдээлэл бүртгэгдсэнээс зөрчлийн шинжтэй 736, гэмт хэргийн шинжтэй 100 дуудлага, мэдээлэл байна.

Мөн гэмт хэргийн шинжтэй 1 үйлдлийг шуурхай илрүүлж, урьд өмнө бүртгэгдсэн 24 хэргийг нөхөн илрүүллээ гэж Цагдаагийн Ерөнхий Газрын Хэвлэл Мэдээллийн төвөөс мэдээллээ.

“Улаанбаатар марафон-2026” олон улсын гүйлт 2026 оны тавдугаар сарын 23-ны өдөр зохион байгуулагдана. Энэ жилийн марафонд 46 мянга гаруй хүн бүртгүүлсэн нь өнгөрсөн жилийн оролцогчдоос даруй хоёр дахин өссөн үзүүлэлт болж байна.

Оролцогчдын тоо эрс нэмэгдсэнтэй холбоотойгоор зохион байгуулагчид гарааны аюулгүй байдал, замын ачаалал, гүйгчдийн урсгалыг зөв зохион байгуулах үүднээс төрөл тус бүрийн гарааны цагийн хуваарьт өөрчлөлт орууллаа. Тодруулбал, бүтэн марафон буюу 42.195 км-ийн ангилал өглөөний 07:00 цагт Соёлын төв өргөөний баруун талаас гарах бол хагас марафон 21.095 км болон 10 км-ийн төрөл 08:30 цагт эхэлнэ. Эрүүл мэндийн 5 км-ийн гүйлт 13:00 цагт МУИС-ийн урдаас гарах бөгөөд 1.5 км-ийн гэр бүлийн ангилал 15:00 цагт эхлэхээр товлогджээ. Мөн тэргэнцэртэй болон харааны бэрхшээлтэй оролцогчдын 1.5 км-ийн төрөл 15:30 цагт МУИС-ийн урдаас гарах юм. Тусгай олимпын 800 метрийн төрөл 16:00 цагт Спортын төв ордны харалдаа замаас, 500 метрийн төрөл 16:10 цагт Улаанбаатар зочид буудлын харалдаа замаас тус тус гараагаа эхлүүлнэ.

Зохион байгуулагчдын зүгээс оролцогчдыг гарааны бүсэд дор хаяж 30-60 минутын өмнө ирж, энгэрийн дугаар, чип болон ангиллын мэдээллээ урьдчилан шалгахыг зөвлөж байна.

“Улаанбаатар марафон” нь нийтийн биеийн тамир, эрүүл амьдралын хэв маягийг түгээн дэлгэрүүлэх зорилготой олон улсын хэмжээний спортын арга хэмжээ бөгөөд жил ирэх тусам дотоод, гадаадын оролцогчдын хүрээ тэлсээр байна.

Гарааны цаг, маршрут болон зохион байгуулалтын талаарх дэлгэрэнгүй мэдээллийг ulaanbaatar.marathon.mn сайтаас авах боломжтой.

Монгол Улсын Ерөнхийлөгч Ухнаагийн Хүрэлсүх цэцэрлэг, Ерөнхий боловсролын сургуулийн багш нартай уулзлаа.

Улс орны ирээдүй болсон хүүхэд, багачуудыг сурган хүмүүжүүлж, мэдлэг, боловсролтой, эх орноо гэсэн сэтгэлтэй, зөв хүн болгон төлөвшүүлэх нэн хариуцлагатай үйлсийн төлөө хүчин зүтгэж байгаа үе үеийн багш нарт Ерөнхийлөгч талархал илэрхийлж, амжилт хүсэн ерөөлөө.

Сайн багшаас чадвартай шавь төрж, чадвартай иргэнээс улсын хөгжил хамаардаг учир багшийн үлгэр дуурайл, зөв хандлага, ур чадвар, ёс зүй хамгаас чухал гэдгийг хэллээ.

“Ерөнхийлөгчийн илгээлт-2100” тэтгэлэгт хөтөлбөрийн хүрээнд гадаадын 21 улсын их, дээд сургуульд 1,055 оюутан суралцаж байна.

Дэлхийн түвшний боловсрол эзэмшин, орон нутаг, улсынхаа хөгжил дэвшлийн түүчээ, манлайлагч болох эдгээр хүүхдийг сургаж, хүсэл мөрөөдлөө биелүүлэхэд нь багш нар үнэтэй хувь нэмэр оруулж байгааг Ерөнхийлөгч тэмдэглэлээ.

Багш нар бол ёс суртахууны ноён оргил байх учиртайг хэллээ.

Тэрбээр төрийн тэргүүнээр сонгогдсоноос хойш хийсэн ажил, тэр дундаа боловсролын салбарт гаргасан санаачилга, үзүүлсэн дэмжлэг, үндэсний хөдөлгөөн, хөтөлбөрүүдийн хэрэгжилт, гадаад харилцаа, нийгэм, эдийн засгийн байдал зэргийн талаар товч танилцууллаа.        

Ерөнхийлөгчийн санаачилга, дэмжлэг, үндэсний хөдөлгөөн, хөтөлбөрүүд  боловсролын салбарт бодит үр нөлөө үзүүлж байгааг сайд Л.Энх-Амгалан хэллээ.

2023 онд Азийн физикийн 23 дугаар олимпиадыг Ерөнхийлөгч ивээл дороо Улаанбаатар хотноо зохион байгуулж байлаа. Мөн эх орондоо болон олон улсад хүлээн зөвшөөрөгдсөн олимпиадад сурагчдыг оролцох боломж, нөхцөлийг бүрдүүлж, урамшуулж байхыг Засгийн газарт чиглэл болгосон.

Үүний дүнд хүүхдүүд сүүлийн таван жилд олон улсын олимпиадуудаас 104 медаль хүртэн, хэдэн арван шагналт байр эзэлж, урамшууллаа аваад байна.

“Эрүүл монгол хүн”, “Хүнсний хувьсгал” хөдөлгөөнөөр дамжуулан хүүхдэд зөв хооллох, эрүүл мэнд, зөв дадал, чадвар төлөвшүүлэхийг давхар зорьдог.

Дунд сургуулиуд “Үдийн цай”, “Үдийн хоол” хөтөлбөрт бүрэн шилжсэн бөгөөд энэ хичээлийн жилээс “Хүүхэд бүрд сүү” хөтөлбөр эрчимжсэн нь дээрх хоёр хөдөлгөөний үр дүн төдийгүй хүнс үйлдвэрлэгч аж ахуйн нэгж, жижиг, дунд бизнес эрхлэгчдэд том дэмжлэг болжээ.

Өнгөрсөн хугацаанд Ерөнхийлөгчийн санаачилга, ивээл дор шинжлэх ухааны ажилтнууд, багш, түүхийн багш нарын Их хурал, улсын зөвлөгөөн болсон бол монгол хэлний багш нар зөвлөгөөнөө хийж, ололт амжилт, тулгамдсан асуудал, гарц, шийдлээ хэлэлцэнэ.

“Тэрбум мод” үндэсний хөдөлгөөнөөр хүүхдүүд байгаль орчноо хайрлах, хамгаалахад суралцаж, багш, ажилтнууд жил бүр сурагчидтайгаа хамт мод тарьж, арчилж, ургуулж байна.

Ерөнхийлөгч У.Хүрэлсүх Ерөнхий сайдаар ажиллаж байхдаа хүүхдийн цэцэрлэг, ерөнхий боловсролын сургууль, дотуур байрыг нүхэн жорлонгоос салгах төсөл хэрэгжүүлж эхэлсэн.

Үүний дүнд 764 цэцэрлэг, сургууль, дотуур байр орчин үеийн ариун цэврийн байгууламжтай болоод байна.

Салбарын яам цаашид хүүхдүүдийг зөвхөн мэдлэгтэй биш, бүтээлч сэтгэлгээтэй, амьдралын аливаа сорилт, бэрхшээлийг даван туулах, хамтран ажиллах чадвартай, бие, сэтгэл, оюуны тамиртай иргэн болгон хөгжүүлж, төлөвшүүлэхэд анхаарах юм.

Мөн багшийн хөгжил, нэр хүнд, нийгмийн баталгааг нь цогцоор нь дэмжих зорилгоор  “Багшийн 3 тулгуурт бодлого” хэрэгжүүлж эхэлжээ. Түүнчлэн багшийн ажлын ачааллыг бууруулах, хиймэл оюун ухааныг сургалтад нэвтрүүлэх, хүртээмжтэй цахим боловсролыг хөгжүүлэх бодлогыг үе шаттай хэрэгжүүлнэ.

Ерөнхийлөгч У.Хүрэлсүх мөн Нийслэлийн Ерөнхий боловсролын 5 болон 17 дугаар сургуулийн ахмад багш Жамбын Бааст, Нийслэлийн Ерөнхий боловсролын 12 дугаар сургуулийн захирал Мишигдоржийн Туулсайхан нарт Гавьяат багш цол хүртээж, нэр бүхий багш нарыг төрийн дээд одон, медалиар шагналаа.

Олон улсын гэр бүлийн өдрийг тохиолдуулан Улсын Их Хурал дахь эмэгтэй гишүүдийн санаачилгаар “Хүүхэд, гэр бүлийн хөгжлийг дэмжих бүлэг”-ийг байгуулж байгаа талаараа Улсын Их Хурлын эмэгтэй гишүүдийн төлөөлөл өнөөдөр /2026.05.15/ мэдээллээ.

Монгол Улсын нийт хүн амын 37.1 хувийг эзэлж буй хүүхэд, залуучууд болон 997 мянга орчим орчим гэр бүлийн, хөгжил, хамгаалал, эрх зүйн орчныг боловсронгуй болгох чиглэлээр бодлогын түвшинд анхаарч ажиллах “Хүүхэд, гэр бүлийн хөгжлийг дэмжих бүлэг”-ийг байгуулах санаачилгыг дэмжин Улсын Их Хурлын 58 гишүүн гарын үсэг зурсан болохыг Д.Үүрийнтуяа гишүүн мэдээллээ.

Эдгээр гишүүн хүүхэд болон гэр бүлийн хөгжлийг дэмжихтэй холбоотой шаардлагатай хууль, эрх зүйн орчныг бүрдүүлэх, сайжруулах чиглэлээр Засгийн газар болон Улсын Их Хурлын гишүүдээс өргөн мэдүүлсэн төслүүдийг хэлэлцүүлэгт бэлтгэхэд манлайлж ажиллах юм байна.

Улсын Их Хурал 2026 оныг “Хүүхдийн төлөө жил” болгон зарласан бөгөөд М.Бадамсүрэн нарын Улсын Их Хурлын 21 гишүүн санаачлан боловсруулсан Хүүхдийн хөгжлийн дэмжих тухай анхдагч хуулийн төслийг Улсын Их Хуралд өргөн мэдүүлээд байгаа юм хэмээн Улсын Их Хурлын Хэвлэл мэдээлэл, олон нийттэй харилцах газраас мэдээллээ.

Монгол Улсын Ерөнхийлөгч, Зэвсэгт хүчний Ерөнхий командлагч Ухнаагийн Хүрэлсүх Хууль зүйн салбарын бие бүрэлдэхүүний төлөөлөлтэй уулзлаа.

Уулзалтад Хил хамгаалах ерөнхий газар, Шүүхийн шийдвэр гүйцэтгэх ерөнхий газар, Цагдаагийн ерөнхий газар, Дотоодын цэргийн штаб, Шүүх шинжилгээний ерөнхий газрын удирдах албан тушаалтан, ажилтан, алба хаагчид оролцлоо.

Ерөнхийлөгч, Зэвсэгт хүчний Ерөнхий командлагч У.Хүрэлсүх, өргөсөн тангарагтаа үнэнч байж, төр, ард түмнийхээ амар тайван, аюулгүй байдлыг хангах, хүн биш, хууль засагладаг нийгмийг төлөвшүүлэхийн төлөө хүчин зүтгэж байгаа үе үеийн ажилтан, алба хаагчдад талархал илэрхийллээ.

Цаашид улс орны язгуур эрх ашиг, үндэсний аюулгүй байдал, шударга ёсыг дээдэлж, сахилга, хариуцлагатай, өндөр ёс зүйтэй, иргэддээ ээлтэй, хүний эрх, эрх чөлөөг хангахын төлөө хичээн ажиллахыг захилаа.

Тэрбээр Ерөнхийлөгч, Зэвсэгт хүчний Ерөнхий командлагч болсноос хойш хууль зүйн салбарт хийсэн ажил, дэмжлэг, санаачилсан хуулийн төсөл, үндэсний хөдөлгөөн, хөтөлбөр, гадаад харилцаа, нийгэм, эдийн засгийн байдал зэргийн талаар товч танилцууллаа.

Салбарын яам хууль, эрх зүйн орчныг илүү тодорхой, хэрэгжихүйц болгон сайжруулахад анхаарч, иргэн төвтэй эрх зүйн шинэчлэл хийнэ.

Хуулиудын хэрэгжилт хангалтгүй байгаагаас иргэний эрх зөрчигдөх, хууль, шүүх, цагдаагийн байгууллагад итгэх иргэдийн итгэл багасах, хуулийн зөрчил нэмэгдэх, хуулийг орлосон зохицуулалт, тэр дундаа авлига, хүнд суртал бий болох суурь болж байгааг сайд С.Амарсайхан хэллээ.

Цаашид хууль тогтоомж боловсруулахдаа эрдэмтэн судлаачдын зөвлөмж, иргэдийн санаа бодлыг тусгах, олон нийтийн хэлэлцүүлэг өрнүүлэх, гадны сайн туршлагыг нэвтрүүлэх нь зүйтэй гэж үзсэн байна.

Цаашид Эрүүгийн хууль, Зөрчлийн тухай зэрэг хуульд нэмэлт, өөрчлөлт оруулах бөгөөд зарим төрлийн эрүүгийн болон зөрчил шалгах, шийдвэрлэх хялбаршуулсан ажиллагааг цахим хэлбэрээр явуулах, цахим гарын үсэг ашиглан зайнаас асуудлаа шийдвэрлүүлэх, оролцох боломжийг судалж эхэлжээ.

Мөн Мансууруулах эм, сэтгэцэд нөлөөт бодисын эргэлтэд хяналт тавих хуулийн төслийг батлуулан мөрдүүлнэ.

Салбарын хэмжээнд иргэдэд төрийн үйлчилгээг хүнд суртал, дарамт шахалтгүй, түргэн шуурхай хүргэх боломжийг бүрдүүлэхийн тулд хүний эрхийг хязгаарласан, албан тушаалтанд эрх мэдэл, давуу байдал бий болгосон шинжтэй дүрэм, журмуудаа хүчингүй болгох юм байна.

Хууль зүйн салбарын хамт олон хуулиар хүлээсэн үүргээ нэр төртэй, чин шударгаар биелүүлэхийн зэрэгцээ Ерөнхийлөгчийн бодлого, үйл ажиллагааг тууштай дэмжиж, санаачилсан хөдөлгөөн, хөтөлбөрийн хэрэгжилтэд урьдын адил хувь нэмрээ оруулахаа илэрхийллээ.

Ерөнхийлөгч мөн өдөр Шүүх шинжилгээний ерөнхий газрын Ахмадын хорооны дарга, цагдаагийн бэлтгэл хурандаа Равагийн Пүрэвжав, Цагдаагийн ерөнхий газрын Санхүү, ар талын албаны дарга, цагдаагийн хурандаа Дэмчигийн Батчулуун нарт Гавьяат хуульч, Хилийн цэргийн 0164 дүгээр ангийн ахмад жолооч, бэлтгэл ахлагч Үржингийн Сэргэлэнд Гавьяат тээвэрчин, Дотоодын цэргийн 805 дугаар ангийн захирагч, хурандаа Жамцын Түмэнтулгад Үйлчилгээний гавьяат ажилтан, Шүүхийн шийдвэр гүйцэтгэх ерөнхий газрын харьяа Хорих ял эдлүүлэх албаны Соён гэгээрүүлэх хэлтсийн дарга, дэд хурандаа Энхтайваны Болормаад Гавьяат жүжигчин цол хүртээлээ.

Мөн нэр бүхий эрхмүүдийг төрийн дээд одон, медалиар шагналаа.