Сүхбаатар дүүргийн 16 дугаар хорооны өрхийн эмнэлэг автомашинтай боллоо

Өнөөдөр Сүхбаатар дүүргийн 16 дугаар хорооны “Мандам” Өрхийн эрүүл мэндийн төвд эмнэлгийн тусламж үйлчилгээний зориулалтын авто машин хүлээлгэн өгөх ёслолын үйл ажиллагаа боллоо. Энэхүү эмнэлгийн зориулалтын автомашиныг “Саплей чейн” ХХК-ийн хамт олон болон иргэн Э.Мандуул санаачлан Япон улсын Фүкүока мужийн Фүкүока хотын төв Гал сөнөөх газраас санхүүжүүлж олгож байгаа юм.
Ингэхдээ тэд дүүргийн Засаг даргатай зөвшилцсөний үндсэн дээр хотын төвөөс 15 км зайтай оршдог, 749 га газар нутгийг хамардаг, гэр хорооллын хамгийн их хүн амтай тус хороог сонгосон байна.
Эмнэлгийн тусламж үйлчилгээний авто машинтай болсноор иргэдэд эрүүл мэндийн үйлчилгээ түргэн шуурхай хүрч, чанарт ахиц гарах олон давуу талтай.
Дашрамд танилцуулахад санаачлагч Э.Мандуул нь эмч мэргэжилтэй, Япон улсад ажиллаж амьдардаг бөгөөд түүний аав н.Энхжаргал нь “Сүхбаатар” Эрүүл мэндийн төвд олон жил ажиллаж байсан эмч хүн байсан тул аавынхаа дурсгалд зориулж, энэхүү сайн үйлсийг хэрэгжүүлжээ.