Завханы төвд хүчтэй аадар орж, үер буув

Завхан аймгийн нутгаар хоёр хоног бороошин аадар орсноос аймгийн төв Улиастай хотод хэд хэдэн газарт үер буужээ. 7 дугаар сарын 4-нд орсон аадар борооны улмаас Улиастай сумын Өлзийт багийн нутаг дэвсгэрт үер бууж Богдын голын усан цахилгаан станцын харьяа дизель станцын хаягдал тос /маслын/ тогоо усаар дүүрч Богдын гол руу урсаж аюултай нөхцөл байдал үүссэн байна. Аймгийн Онцгой байдлын газрынхан үерийн дуудлагаар шуурхай ажиллаж үерийн голдирлыг өөрчилсөн байна. Энэ үеэр аймгийн Онцгой байдлын газрын 15 алба хаагч, Цагдаагийн газрын таван алба хаагч, Мэргэжлийн хяналтын газар, Хот тохижилтын газар, Алтай-Улиастай эрчим хүчний газар, иргэдийн хамтарсан 66 хүний бүрэлдэхүүнтэй баг, 15 техник хэрэгсэлтэйгээр ажиллажээ. Энэ үеэр үерийн бохир усанд автсан гурван айлыг нүүлгэн шилжүүлсэн байна.

Тухайн өдөр Улиастайгаас Говь-Алтай чиглэлийн улсын чанартай А-1103 дугаартай автозамын модон гүүр унаж автомашин зорчих аргагүй болсныг түр зам гаргаж автомашиныг саадгүй зорчдог болгоод байна. Мөн 7 дугаар сарын 5-ны өдрийн 14.00-15.00 цагт орсон аадар борооны улмаас Улиастай сумын Чигэстэй, Жаргалант багт үер бууж хатуу хучилттай зам үерт автаж, үерийн далан, шуудуу эвдэрчээ. Чигэстэй голын эргээр зусландаа буусан хоёр айл, зургаан хүн үерт боогдсон, нийт 37 айл өрх, нэг үйлчилгээний газар үерт автсаныг аймгийн Онцгой байдлын газар, Цагдаагийн газар болон холбогдох албаны 60 хүн, 10 техник хэрэгсэлтэйгээр ажиллаж аврах ажиллагаа явуулжээ. Энэ удаагийн аадар бороо нь нийт нутгийн хуурайшилтын үед орсон уруйн үер юм. Тиймээс голын сав болон эрэг дагуу суурьшиж зусч буй, аялал зугаалгаар явж буй иргэдийг үер усны аюулаас болгоомжилж, бага насны хуүхдүүдээ хараа хяналтгүйгээр гол руу явуулахгүй байх, голын эрэг орчмын газарт тоглуулахгүй байх, баталгаат зам гүүрээр зорчиж байхыг аймгийн Онцгой байдлын газраас анхааруулж байна.