Ж.Жаргалын “Нарны охин” роман таныг элбэрэл хайраар уяраана

Сэтгүүлч,зохиолч Ж.Жаргал эгч дүүсийн бодит түүхээс сэдэвлэн туурвисан “Нарны охин” романаа уншигч танд өргөн барьж байна. Зохиолч маань хүний амьдралын сайхан хийгээд саарыг романдаа тунгаан бичжээ. Нэгэн эхийн хэвлийгээс мэндэлсэн эгч дүүс хэний ч санаанд багтамгүй, хатуу хэцүүг туулсан тухай уншихад  хувь тавилангийн эргүүлэг байсан гэж үү хэмээн  бодогдоно. Хайр татан өсч өндийсөн хоёр сайхан охин юуны учир амьдралын нугачаанд бүдчин унаж босон урагш тэмүүлсээр эцэст нь нэг нь хорвоог орхин наран зүг одов. Сэтгэл сэмрүүлсэн гуниг харамсал,амьдралын сайхныг амтлах хүсэл,хэрсүүжиж амжаагүй гэнэн томоогүй зан гээд юу эсийг зохиолч зүрхнээсээ өгүүлснийг уншигч та тунгаана биз ээ. Уг номыг уншихад амьдрал бол адал явдал юм. Бас аядуу зөөлөн хийгээд хатуугаас хатуу сургамж гэж эрхгүй дуу алдмаар. Хувь тавилангийн эргүүлэг,хатуу орчлонгийн гэсгээл хэнд ч тохиолдохыг хэн мэдлээ. Хэн нэгний алдаа нөгөө хүнд сургамж болох нь бий. Тэр болгоныг тунгаан бичсэн зохиолч бүсгүй өнөө цагт бусдын л адил амьдрах гэж зүтгэсэн эгч дүүсийн бодит түүхийг хэн нэгэнд санаа аваасай хэмээн бодсон буй заа. Хатуу бүхнийг хайраар өлгийдөж бичихдээ өнөөдрийн нийгэмд сургамж дохио өгөхийг л хичээсэн нь уг номын зорилго гэдэг нь тодхон. “Нарны охин” роман таны сэтгэлийн утсыг хөндөн, элбэрэл хайраар уяруулна.Таалал орших болтугай.