“Новости Монголии” сонин “Миний мэдэх Орос орон” уралдааны шилдгүүдийг тодрууллаа

Уг арга хэмжээнд МОНЦАМЭ агентлагийн дарга Б.Ганчимэг, Монгол Улс дахь ОХУ-ын Элчин сайдын яамны нэгдүгээр нарийн бичгийн дарга Евгений Иванович Лиштованный, Монгол Улс дахь ОХУ-ын Элчин сайдын яамны хэвлэлийн атташе Ксения Панкова, монгол судлаач Юрий Николаевич Кручкин болон уралдаанд оролцсон орос хэлний сургалттай сургуулиудын сурагч, багш нар оролцсон юм.

Орос хэлний сургалттай сургуулиудын 11-12 дугаар ангийн сурагчдын дунд зохиогдсон эл уралдаанд нийт 49 хүүхэд оролцсноос ОХУ-ын ЭСЯ-ны дэргэдэх 14 дүгээр сургуулийн 11 А ангийн сурагч Н.Энхдөлгөөн тэргүүлж нэгдүгээр байрт шалгарлаа. Шагналыг МОНЦАМЭ агентлагийн дарга Б.Ганчимэг гардуулан сурагч Н.Энхдөлгөөнд амжилт хүсэв.
Удаах байрт Монгол-Оросын хамтарсан 3 дугаар дунд сургуулийн сурагч Н.Саран, гуравдугаар байрт “Руссая гимназия” үлгэр жишээ дунд сургуулийн 12 дугаар ангийн сурагч Б.Ундаръя нар шалгарсан бөгөөд шагналыг ОХУ-ын ЭСЯ-ны яамны нэгдүгээр нарийн бичгийн дарга Евгений Иванович Лиштованый, Монгол судлаач Юрий Кручкин нар гардууллаа.

МОНЦАМЭ агентлаг ОХУ-ын ЭСЯ-тай хамтран “Миний мэдэх Орос орон” уралдааныг үргэлжлүүлэн жил бүр уламжлал болгон зохион байгуулахаар боллоо. Мөн тус агентлагаас таван хэлээр эрхлэн гаргадаг сонинуудын нэрэмжит зохион бичлэгийн улсын уралдааныг жил бүр зохион байгуулж өргөжүүлнэ хэмээн МОНЦАМЭ агентлагийн дарга Б.Ганчимэг мөн үеэр онцлов.

Тухайлбал “Хүмүүн бичиг” сониноос “Монголын сайхан бичигтэн” улсын уралдааныг 21 дэх жилдээ зохион байгуулаад байгаа юм.