Эх орноо мөлжин баяждаг дарга нар ичиг,ичиг

Эдийн засаг хямарлаа, өр зээл хэцүүдлээ гээд хичнээн ч ярив даа. Үнэндээ ч хэцүү байгаа нь үнэн л дээ. Төсвийн тодотгол хэлэлцэх үеэр ар хормойгоо авч урд хормойгоо нөхөх нь үү гэлтэй юм сонсдож байв. Сангийн сайд долоон төрлийн татвар нэмэх тухай, хүүхдийн мөнгийг зарим айлын хүүхдэд өгөхгүй байх тухай сэтгэл гонсойтол яриад нэлээд удав.

Ард түмний нуруу бөгтийгөөд л байгаа. Хэзээ нэг амсхийхийг мэдэх аргагүй. Монгол хүн тэвчээртэй юм болохоороо дуугүй л байгаа. Гэхдээ тэвчээр хаа хүрээд дуусахыг одоохондоо ямар ч үзмэрч мэргэч төлгөч хэлж мэдэхгүй. Өнөөдөр ядарсан борчуул шургаж унатлаа хөдөлмөрлөж олсон багахан орлогоо амьдралдаа хүргэх гэж тамираа барж байна.

Засгийн газрын тогтоосноор сарын цалингийн доод хэмжээ 240 мянган төгрөг. Ийм мөнгийг сардаа хүргэж амаа хөдөлгөнө гэдэг ур ухаан шаардана. Цөөхөн хэдэн цаасаа өмсөнө зүүнэ,автобусанд өгнө, хүүхэддээ талхны мөнгө үлдээнэ,өр зээл төлнө гээд хүргэхийг л бодно. Сангийн сайдын хэлснээр монгол айл өрхийн дундаж орлого 800 мянган төгрөг гэнэ. Тийм мөнгөөр амьдрах хялбар гэж үү. Өдрөөс өдөрт хүнс барааны үнэ тэнгэр рүү цойлсоор байгаа. Тэрнийг оосорлож тогтоох боломжгүй. Харин баячуулд талх ямар үнэтэй байх падгүй. Тэдэнд хангалттай орлого,мөнгө хөрөнгө бий. Баян дээр нь баян болгохыг төр анхааралдаа авдаг болохоор тансаглал тэдний имиж.

Хамгийн сүүлийн баримт дурдахад, Монголын ганц саалийн үнээ Эрдэнэтийн ТУЗ-ийн гишүүдийн нэг сарын цалин 4000 доллар. Х.Бадамсүрэн захирлын сарын цалинг 25 сая төгрөг болгон нэмлээ гэж мэдээлсэн. Гэхдээ үүнд урамшуулал, нэмэлт цалин ороогүй гэнэ билээ.

Ард түмэн аз нь шовгор Х.Бадамсүрэн захиралтай барьцаад юу ч олж долоохгүй. Үүнийг хэлэхийн учир нь, төрийн өмчит компаниудын захирлуудын цалинг багасгана энэ тэр гээд яриад байсныг сануулах гэснийх. Х.Бадамсүрэн захирал Монголоо гэсэн сэтгэлтэй бол ганцаараа ийм их цалинг барж ядаж идэхээр эдийн засгийн хямралд идэгдсэн эх орноо бодсон бол… Түүний орлогчууд, ТУЗ-ийн нөхөд ч бас даруухан байхыг хүссэн бол… гэж бодогдох юм. Х.Бадамсүрэн ажлаа авангуутаа өөрийн хэрэгцээнд зориулж 300 сая төгрөгөөр автомашин худалдан авах тушаал гаргасан байв. Бодвол одоо тэр машинаа унаад сүнгэнэж байгаа биз. “Монголын хамгийн том үйлдвэрийн дарга цагтаа онгоц хөлөглөдөг байлаа.

Аюулгүй байдлаа хангаж шинэ машин авалгүй яахав” хэмээн намын нөхөд нь тал зассан дуулдана. Энэ бол ердөө ганц жишээ. Энэ мэтчилэн ядуу эх орноо язартлаа идэж байгаа  дарга нарын тансаглан жаргаж буйг тоочоод баршгүй. Хэдхэн хоногийн өмнө нийслэлийн ИТХ-ын тэргүүлэгч 45 хүн бүгдээрээ энгэртээ монетоор хийлгэсэн тэмдэг зүүхээр болсон дуулдав. Сингапур улсад уг тэмдгийг хийлгэх бөгөөд нэг бүр нь 840 мянган төгрөгийн үнэтэй. 45 хүний энгэрт гялалзах учиртай тэмдгийг 37 сая 800 мянган төгрөгөөр хийлгэхээр төсвөөс мөнгө гаргаж байгаа аж. Эдийн засаг хүнд байна,хямрал хэцүү байна,мөнгө хөрөнгө байхгүй,байгаа нь хүрэхгүй байна  гэж улиглаж байгаа дарга нар ичиж амьдраасай. Энэ мэт баримт ил болох тоолонд сэтгэл эмзэглэн сонсох юм даа.

Н.Дөлгөөнжин