“Гол тоглогч” номын нээлт өнөөдөр болно

Монголын гол, гол улстөрчдийн талаар тун хоржоонтой, ёжтой, нүцгэн үнэнийг уудлан дэлгэсэн 16 хөрөг, памфлет бүхий “Гол тоглогч” ном худалдаанд гарлаа. Номын нээлт өнөөдөр “Интерном” их дэлгүүрийн төв салбарт 12 цагаас болох аж.

Төрийн зүтгэлтнүүдийн улс орны түүхэнд нөлөөлж ирсэн бодит үйл явдлууд, хөшигний ар дахь тэдний үнэн нүүр царай, дүр төрхийг баримтад тулгуурлан илчлэхдээ, онч үгс, оновчтой ёгт илэрхийлэл, хошин мэдрэмж бүхий бодит зураглалыг тус номонд дүрсэлжээ.

Монгол Улсын дөрөв дэх ерөнхийлөгч Ц.Элбэгдоржийг “Сүүлчийн гавьяат жүжигчин”, Хууль зүй дотоод хэргийн сайд Ц.Нямдоржийг “Хүн “зуудаг” хоточ”, Монгол Улсын гурав дахь ерөнхийлөгч Н.Энхбаярыг “Манай үеийн “мангас”, УИХ-ын гишүүн Сү.Батболдыг “Хүйтэн цуст” капиталист, Монгол Улсын Ерөнхийлөгчийн тамгын газрын дарга З.Энхболдыг “Зэлтэрийн гацааны Зи “бацаан” гэх зэргээр тун сонирхолтой, адал явдалтайгаар дүрслэн бичсэн нь уншигчдын сонирхлыг тун ихээр татах биз ээ.

Тэдний талаар тун зоригтой, ур чадварлагаар хэрхэн бичсэнийг энэ номноос уншиж болохоос гадна “Херо” Б.Баатар, Монгол Улсын дархан аварга Ж.Мөнхбат, Н.Төгсцогт, их найрагч Бавуугийн Лхагвасүрэнгийн тухай сонирхолтой хөргүүдийг унших боломжтой. “Гол тоглогч” ном нь сэтгүүлч, яруу найрагч Д.Дамдинжавын гурав дахь бүтээл аж.

Ингээд та бүхэнд номын талаар ойлголт өгөхийн тулд номноос авсан доорх ишлэлүүдийг хүргэж байна.

• …Ц.Элбэгдорж намхан. Гэвч улс төрийн тэнгэр түүнд хэзээ ч өндөрдөж байгаагүй юм. Улс төрийн тайз хатуу. Ямар ч хүн тэр тайзан дээр 26 жилийн турш үзэгчдийг уйдаахгүйгээр “жүжиг” тоглоно гэдэг хэцүү.

                                                            (“Сүүлчийн гавьяат жүжигчин” нийтлэлээс…)

• …Улс төрийн хувьд хэдийнээ “үхдэл” болчихлоо доо гэж бодтол эргээд л босоод ирэв. Тэр толгойг нь тасдсан ч дахиад л толгой ургаж гарч ирээд байдаг мангас аятай л аашилж байна. Н.Энхбаяр бол аюул занал, “хадны мангаа” байсан юм.

(“Манай үеийн мангас” нийтлэлээс…)

• …Хотонд хоёр янзын хоточ бий. Нэг нь хотоо манадаг бол нөгөө нь хэвтэрээ манадаг. Нэг нь чоно зуудаг бол нөгөө нь хүн зуудаг. Зуумтгай чанар бол түүний оршин байхын үндэс. Тиймээс л төрийнхөө хатуу чанга оосроор гинжлэн уяж, 25 жил хотоо мануулсан ганц зуудаг хоточ минь…

(“Хүн зуудаг хоточ” нийтлэлээс…)

• …Шазуураа зуучихаараа тавьдаггүй “шавилхан биетэй бацаан”-ыг алх барьчихаараа ийм том дарангуйлагч болно гэж хэн санах билээ. Бөхөөр бол тэр зодог тайлах болоогүй байсан юм. Тэр ч бүү хэл, тахимаа ч өгөх хүсэлгүй байна…

(“Зэлтэрийн гацааны Зи бацаан” нийтлэлээс…)

• Тэр өөрийгөө бурханы алдаа гэж тодорхойлсон. Алдаа, алдаадаа бүр цор ганц алдаа нь аж. Дахин давтагдахгүй, ахиж хийе гээд ч арга хэлбэр, ааш араншинг нь ав адилхан зурж, бүтээж чадахааргүй агуу том “алдаа” юм.

(“Тэр бол бурханы алдаа” нийтлэлээс…)

Б.Баргужин