Тулаант, инээдмийн “Улаан Явар” УСК бүх кино театруудын дэлгэцнээ гарч эхэллээ

“Юнивал энтэртайнмент”-ийн ээлжит бүтээл болох инээдмийн, тулаант  “Улаан явар” нэртэй уран сайхны кино өчигдөр буюу 2024 оны нэгдүгээр сарын 1-нд нээлтээ хийлээ.

Энэхүү киноны голлох зураг авалтыг Говь-Алтай аймгийн Бигэр сумын “Онцын Улаан Явар” нэртэй байгалийн үзэсгэлэнт газар хийсэн бөгөөд  Хөвсгөл далай, Эрдэнэт хот, Булган аймгийн үзэсгэлэнт газруудад зарим зураг авалтыг хийсэн байна.

Уг киноны найруулагчаар “Охид” олон ангит киноны найруулагч,  зохиолч Б.Пүрэвдорж ажиллаж,   МУСТА жүжигчин У.Цогтбаяр, Б.Хулан, О.Самданпүрэв, М.Мөнгөнсүх, МУСТА Д.Бэхбилэг, МУГЖ Ц.Баясгалан  нар тогложээ.

Адал явдалт, тулаант энэхүү  киноны тулааны найруулагчаар  Г.Цэрэгбаяр, У.Цогтбаярын орлон тоглогчоор Б.Даваанямбуу болон “Монгол стант” баг хамтран ажилласан байна.

Мөн галт зэвсэг, пиротехникийн мэргэжилтнүүд болон мотоспортын тамирчид хамтран ажилласан бөгөөд жүжигчин У. Цогтбаяр “Би өмнө нь кинонд жаргаж дүр бүтээж байсан бол “Улаан Явар” кинонд “зовж” дүр бүтээлээ” хэмээн хошигнолоо.

Гол дүрийн жүжигчин Б. Хулан эрүүл мэндийн дасгалжуулагч бөгөөд олон төрлийн спорт, тэр дундаа боксын спортоор хичээллэдэг нь энэ кинонд дүр бүтээхэд дөхөм байсан хэмээн ярьсан юм. “Улаан явар” уран сайхны кино нь “Юнивал энтэртайнмент”-ийн гурав дахь уран бүтээл бөгөөд  “Хайрын аялгуу” /2020 /, “Миний сахилгагүй залуу” /2021/ зэрэг залуусын ээдрээт хайрын сэдэвтэй бүтээлүүдээр нь бид мэдэх билээ.

 Тулаант, адал явдалт, инээдмийн “Улаан явар” кино бүх кино театруудаар гарч байгаа тул Та бүхнийг  үзэхийг урьж байна.